Սոչի քաղաքում ավարտվել է ռուսական շաշկու պատանիների և աղջիկների
առաջնությունը: Մինչև 7 տարեկանների մրցապայքարում փայլուն է հանդես եկել
Արտակ Ալիխանյանը: Նա վաստակել է 8 միավոր 9 հնարավորից և նվաճել Եվրոպայի
չեմպիոնի կոչումը կայծակնային շաշկիում: Նշենք նաև, որ այս հաջողությունը
աննախադեպ է Հայաստանի շաշկու պատմության մեջ: Իսկ 10 տարեկանների խմբում
հանդես է եկել Արտակ Սահրադյանը: Վերջին տուրից առաջ նա վաստակել էր 4
միավոր 6 հնարավորից և հավակնում էր մեդալների: Վերջին տուրում նա հանդիպել
է ապագա չեմպիոնին` ռուսաստանցի Գորբակոնին, ոչ-ոքիի դեպքում Արտակը մեդալ
կնվաճեր: Լարված և դիտարժան պարտիայում, ցավոք, Արտակը պարտություն է կրել
և գրավել է 6-րդ տեղը: Բայց այդ պարտիան ճանաչվել է Եվրոպայի առաջնության
ամենագեղեցիկ պարտիա, որի համար Արտակ Սահրադյանը պարգևատրվել է հատուկ
դիպլոմով: Իսկ աղջիկների մրցույթում 12 տարեկանների խմբում հանդես եկող
Սոնա Սահրադյանը գրավել է 6-րդ տեղը: 10 տարեկանների խմբում հանդես է եկել
Սոնա Ալիխանյանը: Նա արագ շաշկիում 7 հնարավորից վաստակել է 3,5 միավոր և
30 մարզուհիների մեջ գրավել 12-րդ տեղը: Նշենք նաև, առաջին անգամ է, որ
Հայաստանից աղջիկներ են մասնակցում ռուսական շաշկու Եվրոպայի
առաջնությանը: Մեր բոլոր մասնակիցներն էլ<<Ուսում>>
հանրակրթական դպրոցի սաներ են, որոնց մարզում է Հայաստանի բազմակի չեմպիոն`
Նշան Ալավերդյանը: Ուշադրության է արժանի նաև այն փաստը, որ միջազգային
շաշկու ֆեդերացիայի կողմից հատուկ դիպլոմների են արժանացել
<<Ուսում>> հանրակրթական դպրոցի տնօրեն տիկին Սուսաննա
Թամարյանը և Նշան Ալավերդյանը, աշխարհում շաշկի մարզաձևում մեծ ավանդ
ունենալու և շաշկին պրոպագանդելու համար:
